СЕЛЕКТОРИ НА ФЕСТИВАЛОТ

<

>

Кирил Трајчев - долгометражни филмови

КИРИЛ ТРАЈЧЕВ, професор на Филмската академија при Универзитетот „Гоце Делчев“ во Штип. Од 2015 год. е во функција на научен соработник на Меѓународниот славјански универзитет „Г.Р. Державин“. Учесник е на повеќе алтернативни и непрофесионални филмски и театарски фестивали. Автор е на неколку аматерски кратки филмови. Објавувал авторски текстови во повеќе списанија и зборници. Автор е на една книга од областа на театарската уметност и добитник е на признание за поетска книга. Земал учество и на повеќе научни собири и конференции. Долги години активно учествувал и во реализацијата на повеќе театарски проекти.
<

>

Дејан Здравков - краткометражни филмови

ДЕЈАН ЗДРАВКОВ, роден во Велес, дипломира и магистрира на Институтот за филозофија при Универзитетот „Св. Кирил и Методиј“ во Скопје, а на истиот Институт докторира филозофски науки во 2015 год. одбранувајќи ја дисертацијата под наслов: „Егзистенција и интуиција – Бергсоновото и Хајдегеровото поимање на човекот и времето“ под менторство на проф. д-р Ферид Мухиќ. Се занимава со истражувања во областа на филозофската антропологија и естетиката. Во слободно време се занимава и со пишување на раскази, сценарија за краткометражни играни филмови и со сликарство.

ЖИРИ НА ДОЛГОМЕТРАЖНИ ФИЛМОВИ

<

>

Милчо Манчевски

Милчо Манчевски е филмски режисер и сценарист чии филмови се проектирани на повеќе од 300 филмски фестивали и дистибуирани низ повеќе од 50 земји во светот. Реномираниот ПРЕД ДОЖДОТ (1994) се смета за „еден од најдобрите дебитантски филмови во историјата на филмот“ (Annette Insdorf) и „еден од најзначајните филмови на деценијата“ (Ann Kibbey). Њујорк тајмс го вклучува во „Најдобрите 1000 филмови на сите времиња“, а филмот е добитник на Златниот лав во Венеција и беше номиниран за Оскар. Неговите филмови се дел од курикулумот на бројни универзитети во светот и предмет нa многу есеи и книги. Покрај долгометражните ПРЕД ДОЖДОТ, ПРАШИНА (2001), СЕНКИ (2008), МАЈКИ (2010) и БИКИНИ МУН (2017), Манчевски има режирано и повеќе од 50 кратки филмови (меѓу кои и КРАЈОТ НА ВРЕМЕТО ревијално прикажан на ФФФ 2018). Манчевски има почесен докторат на ВГИК во Москва и во моментот предава на Ферштајн филмската школа на Бруклинскиот колеџ во Њујорк. Досега бил дел од жиријата во Венеција, Шангаj, Варшава, Локарно, Пула итн. Во моментот Манчевски живее во Њујорк и работи на неговото последно играно филмско остварување, филмот ВРБА.

View More
<

>

д-р Дејвид Сорфа

ДЕЈВИД СОРФА е вонреден професор на Филмски студии на Универзитетот во Единбург, програмски директор на магистерските студии по филм, главен уредник на интернационалното списание Филм-Философија (Film-Philosophy) и член на одборот на Africa in Motion Film Festival во Шкотска. Има пишувано за теми како: верувањето, емоциите и субјективноста во филмот, Михаел Ханеке, Јан Шванкмајер и чешкиот филм, како и широк опсег на други теми од областа на филмската уметност. Сорфа има особен интерес за филм-философијата, феноменологијата, егзистенцијализмот и делото на Жак Дерида.

View More
<

>

д-р Бошко Караџов

БОШКО КАРАЏОВ е професор по филозофија и научен истражувач. Магистрирал и докторирал на Институтот за филозофија при УКИМ во областа на современата епистемологија и социологијата на познанието. Повеќе од десетина години работи како универзитетски асистент, доцент и професор по Филозофија, Политичка филозофија и Методологија и епистемологија на научните истражувања, но и како едукатор за филозофија на уметноста и стрип-културата во повеќе интернационални младински образовни програми и школи. Караџов е автор на голем број научни студии и авторизирани предавања; тој е научен соработник/истражувач во областа на графичката литература и интермедијалните жанрови во рамките на научно-истражувачките проекти на Одделението за лингвистика и литературна наука при Македонската академија на науките и уметностите.

View More

ЖИРИ НА КРАТКОМЕТРАЖНИ ФИЛМОВИ

<

>

д-р Габриела Качи Новати

ГАБРИЕЛА КАЛЧИ НОВАТИ работи на пресекот на студиите за перформанс, биополитиката и психоаналитичката теорија. Нејзини есеи за дигиталните култури, филмот, театарот, современите уметности, активизмот и политиката се објавени во еминентни списанија и во повеќе зборници. Редовно држи предавања на интернационални симпозиуми, конференции и институции. Визитинг професор на Тринити колеџот во Даблин (при Школата за креативни уметности), член на истражувачката група „The Anthropocene Atlas of Geneva“ (TAAG) и член на организацискиот и научниот одбор на интернационалната и интердисциплинарна академско-уметничка мрежа „Терор на турнеја“ (Terror on Tour). Докторатот го има одбрането на Тринити колеџот во Даблин (2012), а моментално е истражувач на Институтот Карл Густав Јунг во Цирих.
<

>

м-р Наум Трајановски

НАУМ ТРАЈАНОВСКИ е докторанд при Институтот за филозофија и социологија на Полската академија на науки во Варшава и истражувач при Филозофскиот факултет – Скопје (УКИМ). Магистрирал на студии на национализам (Будимпешта) и регионални студии на Југоисточна Европа (Скопје – Грац – Белград). Во изминативе две години работел како проектен координатор при Европската мрежа „Remembrance and Solidarity“ во Варшава и како советник на интернационалниот проект „COURAGE – Connecting Collections“, во рамки на тимот од Полската академија на науки. Неговата докторска теза се однесува на политиките на меморија во Македонија (1964-2018).
<

>

Иво Бару

ИВО БАРУ, роден во Битола, по завршувањето на филмска режија на националната академија во Букурешт и успешни гостувања на над 30 филмски фестивали, се враќа во својата родна земја со огромен ентузијазам да прави филмови. Режисер на неколку кратки авторски филмови, документарци и асистент на режија на неколку долгометражни играни филмови. Како асистент на режија, Бару бил дел од тимот на романскиот режисер Кристи Пују за „Сиераневада“. Еден од основачите на независната културна иницијатива Контра Кадар и првиот автономен културно социјален центар кај нас (АКСЦ). Осум години бил дел од тимот на фестивалот Браќа Манаки. Денес е дел од првата македонска задруга на потрошувачи на органска храна во Македонија, Наша Добра Земја, како со-основач на задругата.